images (1)

ابو عباس،، چبير أخوته ، و رجّال خيّر ،وصاحب حظ وبخت،،عنده اراضي وبساتين والله مفضل عليه هواي،،اخوته وأهله منجمعين كلهم بخير وامان،مشاكل ماكو بينهم،وكل واحد منهم عنده حلال ومال،،مرات يصير جفاف،،ومرات تمطر الدنيا حالوب ،يموت زرع الناس، بس زرع أبو عباس أخضر،،أبو عباس عياله ما يتمرضون،، ما تصيرله مشكلة لا اله و لا لأهله .التجار ما يشترون حاصل زرع الناس،،بس يشترون حاصل أبو عباس،،وبأي سعر يريد يبيع،،أبو عباس كل ليلة جمعة ياخذ إبنه الچبير عباس للنجف،، يزور و يبات و يعيد الزيارة ،ووراها يروح لمكان بالنجف ، يلگاله شايب تعبان حيل،،،يسأله شلونك ؟ يگله ملتمات،،يگله أبو عباس : تبيع ؟ الشايب يگله أبيع ،أبو عباس يگله : بيش ؟ يجاوبه بهالگد،،فينطيه،،ويدير وجهه ويروح،،إذا الشايب گاله : طارن ،،أبو عباس يگله : الحمد لله و الشكر،،و يرجع لأهله،،و هاي كل ما يروح للزيارة يمر على هذا الشايب ،اذا گاله : ملتمات ، ينطيه الفلوس الي يريدهن ،و إذا گاله: طارن ، يگله الحمد لله و يرجع لأهله،،عباس ما يسأل أبوه عن هذا السر ،عباله بيناتهم تجارة ! .راحت الأيام ، و توفى أبو عباس الله يرحمه ،فعباس هو تكلف بكل أمور ارضهم و الحلال والزرع،،و بعد بطل ما يروح للنجف ،بس بعد وفاة والده ، صارت گاعهم ماتنزرع ،صبخت وصارت بيها آفات،،و الحلال گام يتمرض ،و تجارته تخسر ،واهله صاروا يتمرضون و مشاكل بين عمامه !فسأل أمه : يمه شنو السبب ليش الامور تمشي عكس صارت؟؟شو بحياة أبوي چنا بخير و بركة و نعمة ! گالتله يمه : روح للنجف و زور ،،و إشتري من صاحب أبوك ،،و إن شاء الله يجيك الخير ،گاللها : شأشتري منه ؟ گالتله : روح و إنت تعرف ! ثاني يوم من الصبح راح عباس للنجف ، زار وصلى ، ووصل للشايب ،لگه الشايب حاله باخس حال تعبان كلش ، گاله شلونك ؟ گاله شلوني يعمي؟؟ من موتة أبوك و هنه ملتمات عليه ! گاله : تبيع گاله: أبيع گاله :بيش ؟ گاله :بمية دينار ، إنطاه عباس مية دينار .گاله : حجي رحمة لأمك و أبوك ما تفهمني ،شنو الملتمات ؟ و شنو الطارن ؟ گاله : عمي الملتمات هنه همومي ،أبوك چان يشتري همومي ، آني رجال چبير كلش،،و عندي خمس بنات أرامل و عدهن يتامى،،ومن يحتاجن يجني ، و آني كلشي ما عندي ، فيلتمن علي و تلتم الهموم ،فأبوك چان يشتري همومي ، و من الله يفرجها علي ،بمساعدة من أبوك ،ويطيرن الهموم ، أگدر أنطيهن ، فعرف عباس سبب بركة والده ،والده إلي چان يتاجر ويه رب العالمين،، ((مَّن ذَا ٱلَّذِى يُقْرِضُ ٱللَّهَ قَرْضًا حَسَنًا فَيُضَٰعِفَهُۥ لَهُۥٓ أَضْعَافًا كَثِيرَةً ۚ وَٱللَّهُ يَقْبِضُ وَيَبْصُۜطُ وَإِلَيْهِ تُرْجَعُونَ)) شگد حلوة لو واحد يتاجر ويه ربّ العالمين ! شگد حلوة من تفرّح واحد محتاج و تشتري همومه،،شكد عظيمة،،صدقة السر ،،تدفع عنك وعن اهلك القدر المحتوم،، ((يَمْحَقُ اللَّهُ الرِّبَا وَيُرْبِي الصَّدَقَاتِ ۗ وَاللَّهُ لَا يُحِبُّ كُلَّ كَفَّارٍ أَثِيمٍ ) .