452A441E-A656-4A20-B1E2-BB6389E654F8

#_فيتامينات_و_معادن اليوم منشورنا عن الفولك اسد ... الفولك اسد او الفوليت او مايسمى بفيتامين B9 هذا الفيتامين من الفيتامينات الي جدا مهمه وضرورية لصحتك الجسم يحتاجه لان نمو وانقسام الخلايا يحتاج هذا الفيتامين وبدونه تتعطل عملية النمو والانقسام ... اي نمو بجسمك اي انتاج جديد للخلايا ( مثلا خلايا الدم الها عمر محدد وينتج الجسم غيرها) راح تحتاج هذا الفيتامين ، الاطفال والحوامل يحتاجونه بدرجة اكبر من غيرهم .. نقصانه يسبب انماط من فقر الدم ويسبب امراض الاعصاب ونقصانه عند الام الحامل يسبب تشوهات بالجنين . طبعا هذا الفيتامين من الفيتامينات الذائبة بالماء وكل فيتامين ذائب بالماء الجسم مايكدر يخزن كمية كبيرة منه لذلك اذا ماكان غذائك محتوي عليه فخلال فتره مو طويله ممكن شهر او شهرين راح يصير عندك نقص حاد وتبدي المشاكل.. لذلك احرص على ان يكون غذائك منوع ومحتوي على الفوليت.. يوجد هذا الفيتامين بعدة اغذيها راح نذكر اهمها .. ● البقوليات مصدر غني اله بحيث كوب فاصوليا مطبوخه تنطيك ثلث احتياجك اليومي من الفولك اسد .. وكوب عدس مطبوخ شوربة ثخينه مثلا تنطيك ٩٠ بالميه من احتياجك اليومي .. ● البيض بيه كمية متوسطة من الفولك اسد ● السبيناغ والشوندر والبروكلي والخضراوات الورقية يحتون على كميه كبيره من الفولك اسد . ● الكبد خصوصا البقري يعتبر اغنى المأكولات بالفولك اسد بحيث قطعه ١٥٠ غم بيها كل احتياجك اليومي من الفولك اسد .. ●الفواكه مثل الحمضيات والموز والبابايا تكون غنية بالفولك اسد .. ●الجوز والمكسرات تحتوي على كمية لابأس بيها .. صحة وعافية للجميع د خالد دهان اختصاص ادوية وسموم ..